Bale yn ‘agos iawn’ at adael Real Madrid medd ei reolwr

Gareth Bale Image copyright Getty Images
Image caption Mae gan Bale dair blynedd ar ôl ar ei gytundeb gyda Real Madrid

Mae ymosodwr Cymru, Gareth Bale yn “agos iawn at adael” Real Madrid yn ôl rheolwr y clwb Zinedine Zidane.

Roedd Bale yn absennol o dîm Real a gollodd 3-1 mewn gêm cyn dymor yn erbyn Byern Munich yn America ddydd Sadwrn.

Wrth siarad ar ôl y gêm, dywedodd Zidane: “Rydym yn gobeithio y bydd yn gadael yn fuan, dyna fyse orau i bawb. Rydym yn gweithio ar ei symudiad i dîm arall.

“Does gennai ddim byd personol yn ei erbyn, ond mae amser yn dod pan mae’n rhaid gwneud pethau oherwydd mae’n rhaid i bethau cael eu gwneud,” meddai.

Mae gan Bale dair blynedd ar ôl ar ei gytundeb gyda’r clwb ble mae wedi ennill Cynghrair y Pencampwyr bedair gwaith ers iddo symud o Spurs am £85m yn 2013.

Mae Bale wedi cael ei gysylltu gyda Manchetser United a Spurs, pencampwyr yr Almaen, Byern a hefyd clybiau yn China.

Image copyright Getty Images
Image caption Mae’n beth ‘da i bawb’ os bydd Bale yn symud o Real Madrid yn ôl rheolwr y clwb Zinedine Zidane

Mae anafiadau wedi bod yn broblem i Bale dros y blynyddoedd ac mae ond wedi chwarae 79 o weithiau i Real yn y pedwar tymor diwethaf.

Er gwaethaf sylwadau Zidane, dywedodd asiant Bale, Jonathan Barnett ym mis Mawrth fod y chwaraewr yn “hapus iawn” ac eisiau “treulio ei holl yrfa” yn chwarae i’r clwb.

Ychwanegodd Zidane: “Mae’n rhaid i mi wneud penderfyniadau. Mae’n rhaid i ni newid. Penderfyniad yr hyfforddwr a’r chwaraewr yw pan mae chwaraewr yn gadael, pwy a wyr beth yw’r sefyllfa?

“Fe fydd y sefyllfa’n newid, dwi ddim yn siŵr o fewn y 24 neu’r 48 awr nesaf, ond mi wneith, ac mae’n beth da i bawb,” meddai.

Yn ogystal â phedair Cynghrair y Pencampwyr, mae Bale hefyd wedi ennill pencampwriaeth La Liga, y Copa del Rey, y Super Cup dair gwaith a Chwpan Clybiau’r byd yn ystod ei gyfnod yn Sbaen.

Source – BBC News